Kopje ni vilima vidogo vya mawe ambavyo zinapatikana sana Dodoma, Tanzania. Mawe haya yanapendezesha sana mazingira. Muundo wake ni matokeo ya mchakato wa kijiolojia wa maelfu ya miaka. Kopje ni sehemu ya mifumo ya ikiolojia ya kipekee.
Na pia, kutokana na maendeleo ya haraka ya mji wa Dodoma kama makao makuu ya nchi, tumeanza kushuhudia uharibifu wa kopje hizi kwa kasi kubwa. Hali hii inaweka hatarini ustawi wa mazingira katika eneo hili.
Kopje zinavunjwa ili kupata kokoto kwa ajili ya ujenzi wa miundombinu. Hii imezifanya kuwa rasilimali asilia inayoshambuliwa kwa kasi. Tatizo hili halihusishi tu mji wa Dodoma, bali pia maeneo ya jirani ambapo ukuaji wa miji unabadilisha kabisa mandhari. Ubomoaji wa kopjeinaathiri mazingira na pia makazi ya wanyama mbalimbali kama vile mijusi, ndege, na mamalia wadogo ambao hutegemea mawe hayo kama sehemu yao ya kujificha na kuishi.
Ingawa ukuaji wa Dodoma ni ishara ya maendeleo, ni muhimu kuweka uwiano kati ya maendeleo ya miji na uhifadhi wa mazingira. Njia mbadala endelevu za upatikanaji wa vifaa vya ujenzi pamoja na kutenga maeneo maalum ya hifadhi zinaweza kusaidia kulinda miamba hii mikubwa.
Uharibifu wa kopje pia unagusa urithi wa kitamaduni na sekta ya utalii. Mawe haya huvutia wageni kutoka ndani na nje ya Tanzania, wakifurahia mandhari ya kuvutia na historia yake ya kipekee. Ikiwa kopje zitaendelea kuharibiwa, Dodoma itapoteza kivutio chake cha kipekee cha utalii, jambo ambalo linaweza kuwa na madhara kwa sekta hii muhimu.
Kopje siyo tu miamba ya kawaida—ni alama za historia ya kijiolojia na ni makazi ya mfumo wa ikolojia unaozidi kuwa hatarini. Tunatambua kuwa maendeleo mara nyingi huja na changamoto za kimazingira, lakini kabla ya kubomoa rasilimali hizi za asili, tunapaswa kufikiria njia mbadala zisizoharibu mazingira na viumbe hai. Kutoa thamani na ulinzi unaostahili kwa kopje ni hatua muhimu ili kuhakikisha kuwa hazibaki tu kuwa historia, bali ziendelee kuwa sehemu hai ya urithi wa Tanzania.